Eric Hoekstra

KANAAL 66

Aukje en Oene stiene inoar. Sy hie in flot mantelpakje oan dat har strak om 'e lea sleat. It reade felours fan it kolberke treau him sa deun tsjin har boarsten oan dat se der wat oarlochssuchtichs en ûnmeilydsums troch krige. Yn 'e jierren fyftich stutsen de boarsten fan Doris Day en Jayne Mansfield as agressive spearen nei foaren. Se wie seksy op 'e manear fan Xena de Warrior Princess, de heldinnen fan Spencer syn Faerie Queen, Buffy de Vampire Slayer en al dy dominatriksen dy't as in tsjustere ûnderstream de mainstream fan ûngefaarlike brave Playboykatsjes en Daddy's girls begekje.
  Oene wie allike kant en glêd, mear in skerpe broer as in pendant. In bytsje Charlie Sheen, mar dan wat soldatesker as de wat ferweakke libbensgenieter, hoewol mei deselde sjarme. Net it houterige fan Bruce Spingstien of it âldmannige fan Robert de Niro of Mel Gibson, mar wat jongeseftich. Syn glêde strutsen broek omklamme syn skonken en streake syn krús.
  Beide wiene flintstiennen. At se byinoar wiene dan spatten de fonken derôf. Nije eksperiminten, nije ferwideringen, nije fersoeningen, it wie in universiteit fan wille en geniet mei dy beiden. De nachts derfoar hie Oene sels it idee hân, dat de holle him iepen spatte fan geniet, mei in tsjustere ûndertoan fan pine dy't it geniet noch aksintuearre, en hy hearde in toan dy't der net wie, as hie der in sirene heech en piipjend geid. Of hie dat Aukje west?
  De oare deis stie de man oan de doar. Kreas swart pak, neutraal uterlik, typyske doarkerinner.
  'Ik keapje neat,' woe Aukje mei him ôfweve.
  'Dit is fergees,' sei de man sacht, en liet Aukje beskamme mei it pakje by de doar stean. Doe't se it papier (giel mei swarte seizen derop) benijd iepen tearde, die bliken dat it in ôfstanbetsjinning wie. Der wie ek noch in kaartsje by mei de tekst 'Felisitaasjes! Juster ha jim kanaal 6 helle. Hjoed krije jim dêrom de ôfstansbetsjinning'.
  It sulveren ding lei goed yn'e hân. Ofsjoen fan de pregnante foarm seach it der krekt sa út as in gewoane. Alle getallen stiene der ek gewoan op. Allinne sie der tusken 6 en 7 noch in ekstra getal, 66.
  Se klikte kanaal 66 oan. Der wie krekt in reklame fan de ryksoerheid. In man yn in wite jas fertelde 'en daarom vindt de overheid het belangrijk de kwaliteit van de orgasmen van de Nederlandse burger te bevorderen. Onthoud de tips. U vindt ze op internet op www.overheid.nl maar natuurlijk kunt U ook telefonisch de folder aanvragen bij Postbus 666'. Dêrnei ferskynde it karakteristike symboaltsje dat mei reklame fan de oerheid altyd mank rint.
  Wylst wie Oene thúskommen en smiet syn kantoartas yn in hoeke fan 'e keamer del.
  'Ha Auk,' sei er, 'moai dat oerheid ús belestingsinten lang om let ris goed besteget.' Hy pakte syn ôfstânsbetsjinning en zapte Aukje har kanalen by del. Aukje stiette wat non-ferbale lûden út, dy't se letter gearfetsje soe as 'Oene, do kinst tsjoene'. Har eigen ôfstânsbetsjinning mocht der oars ek wêze, en de fonken fleagen fan Oene ôf. Faak hiene se pine yn 'e holle fan it geniet en hearden se sirenes yn 'e holle.
  En jo lêzer, ha jo al in ôfstânsbetsjinning foar kanaal 66 krigen. Nee? Studearje dan wakker fierder oan de universiteit fan wille en geniet, eksperimintearje mei nije ferwideringen en nije fersoeningen. En as jo op nije hichtepunten sirenes hearre, dan binne jo it miskien sels.