HEGER AS DE HIMALAYA

Efter yn ’e mienskiplike tún fan myn hûs yn Utert stean ik te darten mei El Stiño en Stapper. Stapper en ik sille nei it feest fan Lytse Grapkes en syn húsgenoaten yn ’e Himalaya. Op it stasjon ha we ôfpraat mei It Fjoer Fan Siden. Hy sjocht der goed út, mar sa fielt er him net. Stapper en ik ha beide in tree Euro Shoppa bier yn in Albert Hino tas. We helje in broadsje döner kebab, want it is in fegetarysk feest, en as der sopen wurde moat, moat ik fleis yn ’e bealch ha. Sorry bisten! Wylst Stapper en ik haffelje fan ús broadsje, leit It Fjoer útteld mei syn harsens op ’e steantafel dêr’t ek beide tassen bier op stean.
  ’Het is maar goed dat er tassen om dat bier zitten,’ seit Stapper, ‘anders zag het er niet uit.’

As we tsjinoer de Himalaya út ’e bus stappe, komt der in auto oanriden. It famke nêst de bestjoerder kin ik, it is Stjerren Fan ’e See. As de bestjoerder wat seit, bûch ik foaroer.
  ‘Hee Schlagerman!’ rop ik, ’dat hie ’k net iens yn ’e gaten.’
  We klimme de treppens fan ’e Himalaya op, mar kinne fuort wer nei ûnderen. It feest sil begjinne yn in parkje. We rinne der hinne mei bier, iten, instruminten, hout en in fjoerkoer. Der is spitigernôch gjin fuotbal. In húsgenoat fan Lytse Grapkes seit dat er wol ien helje sil, mar hy makket noch gjin oanstalten. As ik klear bin mei it as in clown eltsenien in hân te jaan, stiet myn bêste maat fan froeger nêst my, Fucking Carlton.
  De loft is as in fûst oan ’e himel en hast eltsenien lit him bedriigje. As de earste drippen falle, wolle de measten útnaaie, en skûlje en feeste yn ’e Himalaya. Se pakke de boel op. It fjoer baarnt yn ’e koer en ik krij flashbacks fan it mêstfjoer yn ’e Alde Feanen. Ek no hâld ik stân. Stapper, de Schlagerman en in jonkje binne solidêr. Om beurten fertelle de Schlagerman en ik in ferhaal. Dikke tûken lizze op it fjoer. It duorret net lang en de rein skijt der wer mei út. Dan docht de Schlagerman in aksje mei it fjoer en falt de koer om. Neffens my hâldt ierde net fan fjoerkuorren.
  In bal sûzet troch de loft oer ús hinne. It is de húsgenoat fan Lytse Grapkes mei twa oaren. Ik draaf der fuort efteroan. Stapper, it jonkje, ien fan de oaren en de húsgenoat dogge mei. Hearlik om tsjin ’e bal te traapjen. De Schlagerman stiet noch by it fjoer te praten mei in lytse jonge mei lang swart hier, Akbar. In moai gesicht. As Akbar ek komt te fuotbaljen bliuwt de Schlagerman noch yn it fjoer ompookjen. Akbar syn earste aksje is oer de bal hinne meane en op it wiete gêrs donderje, om dêrnei de moaiste skopkes te dwaan, en om dêrnei de bal by himsels tsjin ’e bril te skoppen.
  Dan wurd ik belle, want de band fan ien fan Lytse Grapkes syn húsgenoaten sil hast begjinne. As we de top fan ’e Himalaya berikke is de band noch dwaande mei de tariedings. De Schlagerman nimt fuort plak efter it drumstel en sûnder it ea dien te hawwen, drumt er as in kening. As de echte band, de Killerpigeons, begjint en de sjonger de feestgongers freget om te dûnsjen, gean Lytse Grapkes, Fucking Carlton, It Fjoer en ik fuortendaliks los. Mar rjocht foar de sjonger giet de Schlagerman it brútste út syn dak.
  ‘De Schlagerman is vetter as dy, Striid!’ seit It Fjoer Fan Siden mei in grijns.
  ‘Dat is ek sa,’ sis ik, mar it duorret in minútsje foar’t ik it loslitte kin. En It Fjoer stiet mar te laitsjen, dêr die er it om.
  De Schlagerman, It Fjoer en ik komme ek noch foar de mikrofoan. De band spilet en wy spylje der op yn. We dogge schlagers, rock en we rappe. De Killerpigeons en BCD WASH beuke it dak fan ’e Himalaya en ik wit seker dat God sit te smilen. De Schlagerman falt my yn ’e earms, en ik slaan de earms om Fucking Carlton hinne, shake It Fjoer Fan Siden, Lytse Grapkes, de Deadzjende Dowen, Stapper, Akbar en guon oaren.
  ‘Lytse Grapkes hat hasj foar ien joint,’ seit It Fjoer en hy jout my de joint oer. We smoke him as in Fredespiip. Dit wie in feest fan de heechste macht!

*